ដោយ ម៉ៃ ទិត្យថារ៉ា
ភ្នំពេញប៉ុស្តិ៍
ព្រះវិហារៈ ក្រុមអ្នកភូមិក្នុងឃុំស្រយង់ ស្រុកគូលែន ដែលមានវិវាទដីធ្លីជាមួយនឹងក្រុមហ៊ុនសិលាដាម៉ិច បានចោទមន្រ្តីមូលដ្ឋានថា បានគំរាមចាប់ឃុំខ្លួនអ្នកភូមិ ពីបទញុះញង់តវ៉ាប្រឆាំងនឹងក្រុមហ៊ុនខុសច្បាប់ ខណៈដែលពួកគេគ្រោងធ្វើការតវ៉ាប្រឆាំងនឹងក្រុមហ៊ុននៅថ្ងៃចន្ទ នេះ។
លោក លឹម លំ អាយុ ៣២ ឆ្នាំ ជាតំណាងអ្នកភូមិមួយរូបបានឲ្យដឹងថា នគរបាលប៉ុស្តិ៍និងមេឃុំស្រយង់ បានគំរាមចាប់ខ្លួនអ្នកភូមិដាក់គុក បើអ្នកភូមិជួបជុំគ្នាចាប់ពី៣នាក់ទៅក្នុងមួយក្រុម។ លោកប្រាប់ថា៖ «មេប៉ុស្តិ៍ឃុំស្រយង់ ប្រាប់ថាអ្នកភូមិមិនចាំបាច់ចង់ដឹងពីច្បាប់ទេ។ អ្នកភូមិគ្រាន់តែគោរពច្បាប់ទៅបានហើយ។ បើគេឃើញជុំគ្នា៣នាក់មួយក្រុម គេនឹងចាប់ឃុំខ្លួនយើង ដោយចោទយើងពីបទជួញដូរថ្នាំញៀន ឬធ្វើបាតុកម្មខុសច្បាប់»។
លោកមានចម្ងល់ថា ហេតុអ្វីអ្នកភូមិពុំមានសិទិ្ធតវ៉ាប្រឆាំងនឹងក្រុមហ៊ុន ដើម្បីការពារដីរបស់ខ្លួន ខណៈដែលក្រុមហ៊ុនកំពុងឈូសឆាយដីស្រែចម្ការរបស់អ្នកភូមិ។ លោកអះអាងថា៖ «បើទោះជានគរបាលនិងមេឃុំគំរាមក៏ដោយ ក៏យើងនៅតែធ្វើបាតុកម្មនៅ ថ្ងៃស្អែកព្រោះក្រុមហ៊ុនយកដី យើង»។
អ្នកស្រី មាស រ៉េន អាយុ៥០ឆ្នាំ តំណាងអ្នកភូមិ ដែលទទួលបានដីកាពីនគរបាលឃុំពីថ្ងៃទី៥ តុលា បានថ្លែងថា នៅថ្ងៃស្អែកនឹងមានអ្នកភូមិជាង២០០នាក់ ដែលរងផលប៉ះពាល់លើផ្ទៃដីទំហំ ៤៥៤ ហិកតា ពីក្រុមហ៊ុនសិលាដាម៉ិច មកប្រមូលផ្តុំគ្នាតវ៉ាប្រឆាំងមិនឲ្យក្រុមហ៊ុនឈូសឆាយដីស្រែ ចម្ការគាត់ឡើយ ទោះជាអាជ្ញាធរគំរាមចាប់ខ្លួនពួកគេឃុំក៏ដោយ។
អ្នកស្រីបន្តថា៖ «ក្រុមហ៊ុនបានគំរាមយើងថា បើយើងមកធ្វើបាតុកម្មថ្ងៃស្អែក[ថ្ងៃនេះ] ពួកគេនឹងដុតគ្រឿងចក្រពួកគេ នៅពេលយើងវិលត្រឡប់ទៅផ្ទះវិញ ហើយចោទថា ប្រជាជនជាអ្នកដុត»។
លោក ចាន់ សត្យា មេប៉ុស្តិ៍នគរបាលឃុំស្រយង់ថ្លែងថា នគរបាលចង់ការពារអ្នកភូមិកុំឲ្យប្រើហិង្សា ដូច្នេះបើពួកគេជួបជុំគ្នាជាក្រុមពី៣ទៅ៥នាក់ត្រូវជូនដំណឹងឲ្យ នគរបាលចូលរួមបានដឹងថា តើអ្នកភូមិចង់ធ្វើអ្វី។ លោកថា៖«យើងមិនឃុំពួកគេទេ យើងគ្រាន់តែចង់ឲ្យពួកគេមានសុវតិ្ថភាព បើពួកគេជួបជុំគ្នា ពី៣ទៅ៥នាក់ យើងនឹងហៅមកសួរ»។
លោក ជុំ ពយ អភិបាលស្រុកគូលែន បានថ្លែងថា លោកមិនបានដឹងពីការប្តឹងរបស់អ្នកភូមិទេ ប៉ុន្តែក្រុមហ៊ុនសិលាដាម៉ិច ទទួលបានដីសម្បទានពីរដ្ឋាភិបាលក្នុងឆ្នាំ២០០៩ លើផ្ទៃដីទំហំ៩ពាន់ហិកតា ហើយដែលក្រុមហ៊ុនគេត្រូវដាំដុះនៅលើដីនោះ។
លោក អ៊ូច ឡេង ប្រធានកម្មវិធីដីធ្លីរបស់អាដហុកយល់ថា ទង្វើនេះមិនត្រឹមតែប៉ះពាល់ដល់សិទិ្ធមនុស្សទេ គឺថែមទាំងប៉ះពាល់ដល់សិទិ្ធបញ្ចេញមតិផង៕ TK
