ខ្មែរថាមស៍
ភ្នំពេញ៖(ខ្មែរថាមស៍)លោកសៅសុខាមេបញ្ជាការកងរាជអាវុធហត្ថលើផ្ទៃប្រទេសបានចេញបញ្ជាឲ្យមេកងឯកភាពនីមួយៗត្រូវឆាប់និរាករណ៍ចោលជាបន្ទាន់លើប័ណ្ណអាវុធណាដែលចេញដោយខុសច្បាប់នឹងចាប់ខ្លួនអ្នកចុះហត្ថលេខាខុសច្បាប់យកមកដាក់គុក ហើយលោកនឹងដោះសក្ដិខ្លួនឯងចេញបើសិនជាធ្វើកិច្ចការនេះមិនបានសម្រេច។
ថ្លែងក្នុងពិធីបូកសរុបការងាររបស់កងរាជអាវុធហត្ថកាលពីថ្ងៃចន្ទ លោកនាយឧត្ដមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស ឲ្យដឹងថា លោកសូមឲ្យឱកាសនេះទៅដល់អង្គភាពពាក់ព័ន្ធ និងអង្គភាពមិនពាក់ព័ន្ធ សូមឲ្យប្រើវិធានការច្បាប់ចំពោះបញ្ហាការប្រើប្រាស់អាវុធ បើសិនជាគ្រប់គ្រងអាវុធនេះមិនបានទេ គឺសន្តិសុខមិនអាចត្រួតត្រាបានទេ អសន្តិសុខនឹងកើតឡើង។ លោកក៏បាន ចេញបញ្ជាឲ្យពិនិត្យមើលឯកសារចុះហត្ថលេខាឲ្យប្រើប្រាស់អាវុធថា តើការចេញប័ណ្ណប្រើប្រាស់អាវុធនោះខុសច្បាប់ ឬយ៉ាងណា? តើអ្នកណា? ស្ថាប័នណា? អង្គភាពណា? ដែលមានអំណាច ក្នុងការអនុញ្ញាតឲ្យកម្លាំងប្រើប្រាស់អាវុធ។
លោកបានថ្លែងថា៖ «អញ្ចឹងចំពោះអ្នកប្រើប្រាស់អាវុធខុសច្បាប់ជារឿងមួយ ប៉ុន្តែត្រូវស្រាវជ្រាវរកអ្នកស៊ីញេឲ្យឃើញ បើសិនជាអ្នកស៊ីញេហ្នឹង វាមានទោសត្រូវជាប់គុក ត្រូវតែយកអ្នកស៊ីញេហ្នឹងមកដាក់គុកទៀត បើមិនអញ្ចឹងអត់បានទេ ស៊ីញេតែពាស អត់ត្រូវរឿង ពូកែណាស់ ចូលចិត្តម្ល៉េះ អាស៊ីញេខុសរឿងហ្នឹង»។
